Serchhip district-ah sawhthing quintal 4,851.49 hralh a ni tawh

Serchhip District Agriculture Marketing Committee (DAMC) chairman Paul L Khuma, district bawrhsap chuan nimin khan DC meeting hall-ah thuthar thehdarhtute a kâwm a; Serchhip district-a sawhthing hralh leh leina secondary collection centre (SCC) pasarihah Rs 98,33,950 man sawhthing qtl. 4,851.4949 hralh a nih tawh thu a sawi.

Paul L Khuma chuan, February 20, 2025 aṭangin Serchhip district-a SCC-ah sawhthing phurh khawm ṭan a nih thu sawiin, "Sawhthing lei leh hralh thawh khatnaah SCC pasarih hi kg 1,05,000 ṭheuh allotment pek a ni a, sorkarin hriatthiamna thui tak a neih avangin allotment pek zat pêla leieng emaw zat an awm a, vawiin thlengin Rs 98,33,950 man sawhthing qtl. 4,851.49 hralh a ni tawh. Sawhthing man chu loneitute account-ah direct benifit transfer hmanga pek vek tawh a ni," a ti.

Lungpho SCC leh Thenzawl SCC tih loh SCC dang pangaah sawhthing an hralh zo tawh tih sawiin L Khuma chuan, "Kudam tiruak apiangte hi a thawh hnihnaah luhpui ṭan nghal an ni dawn a, Serchhip SCC chuan lilamna (auction) hmasa ber a tichhuak tawh. Thawh hnihnaah hian SCC-te chu anmahni kea ding tura beisei an ni a, DAMC-in auction chhuah tawh loin SCC-te'n an chhuah ang a, sawhthing leitu (buyer) pawh anmahni'n an zawn a ngai dawn," a ti. SCC-te'n sawhthing an hralhna man chu kg. khat Rs 50 a tlin loh chuan a thlin lohna zat sorkarin a tum dawn thu a sawi.

Serchhip DC chuan tun hnaiah Zote South-ah mi ṭhenkhatin SCC kaltlang loin sawhthing hralhna a zawng tih sawiin, "Sawhthing chingtu dangte pawh hrilhin, kg-ah Rs 22/23-a hralh tumin an lo cho lâwk vak mai a, mahse, an hralhna tur chuan a leisak leh mai si loh avangin an beisei angin thil a kal lo a, harsatna an tawk ta a. Hemi chungchang hi thu dik hrûlah mipui ngaihdan hruai kawi zawngin video thehdarh a ni," a ti.