KHAWTHLIR

MCAB-in chêng vbc 46 an hlêp

Mizoram Cooperative Apex Bank chuan nimin khan an pisaah Special Meeting an nei a, kum 2024-25 chhunga MCAB sum chet velna hrang hrang an thlir lêt. Kum 2024-25 chhungin deposit cheng vbc 1,694 an dawng a, loan cheng vbc 1,218 an pe chhuak a, cheng vbc 46 an hlêp a, an credit deposit ratio chu 72% a ni tih tarlan a ni. Ṭhutkhawm hi MCAB chairman Lalnunsanga'n a kaihhruai.

Lei dawh kai dawn

Aizawl-Lengpui inkar Tlawng Sihhmui kaia lei (bridge) dawh thar thawh mek chu lui chunga a awmna turah dawh kài tura peih a ni tawh a, dah kai ṭan tum a nih avangin April 6 tlai dar 4 aṭanga April 8, 2025 tlai dar 5 thleng Sihhmui leh Lengte peng inkar kawng khar a nih tur thu Aizawl SP-in a tarlang. Lengpui Airport leh Mamit lama kal turte chu Buichali lamah kal tura hriattir an ni.

MLA-in hmanpui

South Tuipui bialtu MLA Jeje Lalpekhlua chuan April 3, Ningani zan khan South Chawngtui khuaa YMA, Tuiphai Group YMA inkhawmpui vawi 34-na a hmanpui. Jeje Lalpekhlua chuan, ruihhlo tawlhrûk vangin sum thianghlim lo a tam phah thu a sawi a; YMA branch-te chu ruihhlo donaa hma an lak tawhnaah lawmthu a hrilh rualin, nasa zawka hma la zel turin a chah. Tuiphai Group-ah hian Bualpui-H, Thingsai, Ngharchhip, New Ngharchhip, Cherhlun, Khawhri, Tarpho leh S Chawngtui branch-te an awm a ni.

La thla turin hriattir

Lunglei Municipal Council (LMC) chief executive officer Donny Lalruatsanga chuan hriattirna chhuahin, Lunglei khawpui kawngpui dung (main road) Pukpui - Hrangchalkawn - Zobawk inkarah hoarding (structure permanent) tender hmanga kalpui tawh tur a nih thu a tarlang. Kawngpui dunga department/pawl/kohhran/mimal, etc. thil tartute chu April 30, 2025 ral hmaa an thil tarte senghawi turin a ngen a ni.