Aizawl district chhungah sawhthing qtl 2,761 lei tawh, la lei loh qtl 26,759

Mizoram sorkar flagship programme, Bána Kaih (Handholding) scheme hnuaiah Aizawl district-a secondary collection centre (SCC) kaltlangin sawhthing quintal 2,761.74 lei tawh a ni a, lei tur quintal 26,759 a la awm tura beisei a ni.

Aizawl District Agricultural Marketing Committee (DAMC) chuan nimin khan an chairman Lalhriatpuia, bawrhsap hoin DC Pisapui hall-ah Aizawl district-a sawhthing SCC panga enkawltu leh buaipuitute pualin training an buatsaih a; MAMB co-opted member Lalnunpuia, Cooperation deputy registrar SK Das leh Sihfa M-PACS chairman Saidawla ten thil pawimawhte an zirtir.

Training-a tarlan danin, Aizawl district-a sawhthing lei nan sorkar aṭangin procurement fund first instalment-ah cheng nuai 187.50 leh second instalment-ah cheng nuai 187.50 hmuh a ni tawh a, a vaiin cheng nuai 375 a ni. Sawhthing quintal 2,761.74 lei tawh niin, lei nan cheng nuai 138.087 hman a ni tawh a, la hman loh (balance) nuai 236.913 a la awm. Sawhthing quintal 26,759 lei tur a la awm tura ngaih a ni bawk.

Aizawl district chhung - East Phaileng SCC-a sawhthing quintal 185.84 leh Thingsulthliah SCC-a quintal 155.98 chu Karnataka Spice Trading-in kg khat Rs 20-in an lei a, March 25, 2025 khan thawn chhuah vek a ni.