HCL Tech Bee Job Fairs buatsaih

Mizoram Youth Commission chuan pawl 12 pass tawhte leh result nghak mekte tan nimin khan Mizo High School examination hall-ah HCL Tech Bee Job Fairs/Sensitization Programme an buatsaih a, mi 42 an tel.

Job Fair/Sensitization Programme hi MYC under secretary Lalramdini'n a kaihruai a, Aizawl district education officer C Labiakzauva'n thil pawimawhte a hrilhfiah bakah, zawhna leh chhanna hun hman a ni. HCL Tech official-te'n thu an sawi bawk.

HCL Tech Bee Job Fair hi Mizorama district pangaah neih a ni dawn Aizawl district-ah bul ṭan a ni. Pawl 12 pass hlimte tan HCL Tech Bee company-ah hna thawk chunga lehkha zir chhunzawm zel theih dan leh HCL Tech-a zirlaite tana hamṭhatna awm theite inzirtir ṭhin a ni ang.

HCL Tech Bee hnuaiah hian MBSE hnuaia HSSLC-a 60% hmu chin an inziak lut thei a, inziah luh hnuah enfiahna pali paltlang tur awmin, chumi paltlangte chu HCL Tech Bee-ah thla 12 an training thei a, training chhunga pawisa ngaite chu MYC-in eng emaw zat a tumsak dawn a ni. Training zawhah HCL-ah an thawk zui thei a, lehkha zir chhunzawm duhte chu HCL-in senso eng emaw zat a tumsak dawn a ni.