KHAWTHLIR

Chhawmdawlna pe

Damdawi zuartu pawl, Mizoram Chemists & Druggists Association chuan nimin khan Chief Minister's Relief Fund-ah Rs 6,00,000 an chhunglut. MCDA hi kum 1977-a din a ni a, member 4,000 vel an nei mek a ni.

MLA-in hmanpui

MHIP, Lungdai Block chuan nimin khan Bukpui khuaa Khawkunga Hall-ah inkhawmpui an hmang a, bialtu MLA K Laldawngliana'n a hmanpui. MLA chuan, "Pain chhungkua a din a, nuin a luahlum a, nu chu in chhung missionary a ni. Nu tel lo chuan chhungkua hi kan luahlum zo lo a ni ber a, a theih anga tamin nuin in a luahlum tur a ni," a ti.

E-KYC pawt sei

Ministry of Consumer Affairs, Food and Public Distribution hnuaia Department of Food and Public Distribution thu angin, ration card eng leh card pawla hming chuangte tana e-KYC kalpui mek chu April 30, 2025 thleng pawhsei a nih thu Food, Civil Supplies & Consumers Affairs department chuan a tarlang. e-KYC ti ve lote tan a thlawna ration buhfai pek a nih tawh dawn loh avangin hun tiam ral hmaa e-KYC ti turin card eng leh pawl neitute hriattir an ni.

Larsap-in cadet 6 tablet a hlan

Governor Gen. Dr Vijay Kumar Singh chuan New Delhi-a Republic Day Camp 2025-a tel Mizo NCC cadet parukte nimin khan Raj Bhavan-ah a kâwm a, lawmpuina atan tablet a hlan. Larsap chuan, NCC cadet-te chu chhuanawm a tih thu sawiin, "Mi dangte tana entawn tlak leh mi dangin NCC zawm an châk ve zel theih nana hma hruaitu nih tum u la, hlawhtlinna dangte pawh hmu zel thei turin ṭan la sauh sauh ang che u," a ti.