Nihawi chìn leh enkawl dan zirtir

KVK, Khawzawl chuan nimin khan Mission Oilseed Village atana an thlan Biate khaw rama Hmunte zauah Field School hun an hmang a, kut hnathawktu mi 25-te nihawi (sunflower) chìn leh enkawl dan an zirtir.

Inzirtirna hun hi KVK, Khawzawl senior scientist Dr Malsawmkimi'n a kaihruai a, SMS (Agronomy) Rambuatsaiha'n nihawi chìn dan leh enkawl dan te, nihawi chi aṭanga hriak lâk chhuah dante a zirtir a ni. Biatea nihawi chingtute hnenah hian nihawi chi (variety KSBH 44 UAS) chhungkaw panga hnenah pek a ni a, buh ṭín 4 hmunah chìn a ni.

KVK, Khawzawl hian hriaka intodelhna tura hmalakna an kalpuiah Mission Oilseed Village atan Biate leh Rabung an thlang a, enchhinna kalpui mek a ni. Tunlai hi nihawi par vanglai a ni a, May thla tir lamah seng theih tura beisei a ni.

Nihawi par hi December thla velah chìn a ni a, a chingtute'n leiṭha (fertiliser) an hmang lo. An chìnna hmun (leilet)-ah buh an la chíng leh hman vek tura ngaih a ni.