FOCUS 2.0 hnuaia hmalakna tur sawiho

International Fund for Agricultural Development (IFAD) Design Mission team chuan nimin khan Lunglei leh Siaha an tlawh a, IFAD ṭanpuinaa Mizorama Fostering Climate Resilient Upland Farming Systems in the North East (FOCUS) 2.0 kalpui tura project thar duan tur chung-changah thuneitute an kawm.

FOCUS hi ei leh bara hma­sawnna tur leh kut hnathawh chawikanna tura hmalakna a ni a, FOCUS 2.0 bik chu Mizorama chhungkaw 1,00,000 leh mihring 5,00,000 velin an chhawr theih tura kalpui tum a ni.

Lunglei DC conference hall-ah additional DC Rochuangkimi Khenglawt kaihhruaiin IFAD Design Mission team leh a kaihhnawih sorkar department hotute'n ruahmanna siam dan tur leh hmalakna tur ṭulte an sawiho.

FOCUS 2.0 hmalakna turah Lunglei district ODOP - balhla chinna leh balhla aṭanga thil siam tihlâr leh tihmasawn tura ruahmanna siam dan kawng zawn ni se, an ti a; tui hna humhalh leh tihpun, lei venhim leh sawngbawl, tlang ram loneih thlakna tur ngaihtuah, kut hnathawktute hmanrua leh bungraw mamawhte ngaihtuah, tuilianin leilet a tihbuai ṭhin venna tur siam, kut hnathawktute thar chhuah hralhna tur ngaihtuahte ngaih pawimawh turin an rel bawk.

Siahaah chuan DC mini conference hall-ah IFAD team leh sorkar hotute an ṭhukhawm. Ei leh bara intodelh a nih theih nana huapzo taka project kalpui dan tur te, thlai chi leh ranvulh lam hmasawn theih dan tur leh mipui nawlpui nunah a ṭha zawnga nghawng a neih theih dan turte sawiho a ni.

IFAD ṭanpuinain FOCUS project hi Mamit, Kolasib, Champhai leh Serchhip district-ahte kum 2018-19 aṭang 2024-25 chhungin kalpui a ni tawh a; FOCUS 2.0 hnuaia hmalakna hi kum 2025-26 aṭanga 2031-32 thleng tur niin, Mizorama district zawng zawnga RD block 26-a khaw 700-ah kalpui tum a ni.

FOCUS 2.0 budget-ah US dollar nuai 722.9 vel ruahman a ni a, chu'ng zinga 63.3% chu IFAD tum tur niin, Mizoram sorkar tum tur 20%, scheme dang nena kaihkawp (convergence) aṭangin 11.7% leh ṭanpuina dawngtu (beneficiary)-te tum ve tur 5% ni tura ruahman a ni. Agriculture & Farmers Welfare department hnuaia Society for Climate Resilient Agriculture in Mizoram (SCRAM) chu implementing agency a ni ang.