Hmaituama mi khawihtute an phu tawka hrem ngei CYMA-in phut
Central YMA chuan thuchhuah siamin, Kulikawn Vengthlang Branch YMA member pakhat khawihtu hmaituam rualte chu an phu tawka hrem ngei an phut thu an tarlang.
March 22, 2025-a Aizawl khawpui chhunga branch YMA-te tana 'ruihhlo do hnatlang' buatsaiha ṭhahnem ngai taka thawk chhuakte chungah lawmthu sawiin CYMA chuan, "Hetihlai hian Kulikawn Vengthlang Branch YMA member pakhat chu ruihhlo zuar heka man tirtu nia puhin March 23 chawhma dar 11 bawr velah tu tih hriat loh mipa hmaituam rualten an in aṭanga ko chhuak a, kut an thlak rawn chiam mai hi pawi kan tiin kan hrethiam lo," an ti.
CYMA chuan thil thlenga a mawhphurtute, rang taka Kulikawn Police Station-te'n an man chhuak nghal chu lawmawm an tih thu tarlangin, "La man lohte pawh a rang thei ang bera man tur leh an phu tawk hremna pe ngei turin kan ngen nghal. Ruihhlo do kawnga ṭhahnemngai taka che chhuak, kan branch member-te chunga hetiang a thleng hi a pawi kan ti takzet. A thleng leh tawh tur a ni lo," an ti a, he thil thlenga mawhphurtute an phu tawka hrem an nih loh chuan, YMA a ngawih dawn loh thu an tarlang.