ACB-in regular case chhui mek 15 an nei

March 26, Nilaini tlaiah khan Chief Secretary Conference Hall-ah chief vigilance officer Khilli Ram Meena, CS hoin Vigilance department leh ACB-te'n ACB hnathawh dan leh hmachhawp mekte an thlirho a, ACB-in criminal regular case chhui mek 15 an neih thu tarlan a ni.

Chief Secretary chuan ACB leh Vigilance officer-te chu corruption kaihhnawih dan leh hraite chu nasa leh zuala zir chiang tur leh hrechiang lehzual turin a fuih a, "Sorkar hnathawk eirukna kaihhnawih thubuai neite chu danin a phut ang taka kalpui zel ṭhin tur a ni," a ti.

Thlirhonaa ACB director J Lalṭhafamkima'n a tarlan danin, tun dinhmunah ACB-ah hian hnathawk 67 an awm mek a, chung zinga mi 11 te chu corruption case chhui thei (police inspector leh a chunglam) an ni.

ACB hian tun din hmunah criminal regular case ziahluh leh chhui mek 15 an nei. Preliminary enquiry tih mek 11 a awm. ACB a thubuai ziahluh tam berte hi Aizawl district leh Lawngtlai district aṭanga thubuai lutte an ni.

Thubuai ziahluh zinga tam ber chu sorkar sum hman dikloh (mis-appropriation of govt funds) leh sorkar sum a hmanna tur ni loa hman (criminal mis-conduct) an ni.