Mizoramah ramngaw sq.km 242-in a pung

Green Mizoram Network (GMN) chuan March 26, Nilaini khan Green Park-ah general body meeting an nei a; kum 2021 aiin kum 2023-ah Mizoramah ramngaw sq.km 242-a a pun thu tarlan niin, ramngaw leh nungcha humhalh kawngah ṭan la zel turin Mizoram mipui an ngen.

GMN tarlan danin, kum hnih dana tihchhuah ṭhin India State of Forest Report-2023 (ISFR 2023) thar ber chu December, 2024 khan tihchhuah a ni a, tun dinhmunah India ram pumah ramngaw leh thingin a khuh zau zawng hi sq.km 8,27,357 niin, chu chu India ram zau zawng (geographical area) aṭangin 25.17% a ni. Forest cover bik hi sq.km 7,15,343 leh tree cover hi sq.km 1,12,014 a ni.

Mizoram chuan ISFR 2021 aiin ISFR 2023-ah hma a sawn thu tarlangin GMN chuan, "India ramin hma kan sawnna chu sq.km 1,445 a ni a, Mizoram bikah forest cover punna hi sq.km 242 niin, India ramah pakhatna kan ni. Ram zau zawng (geographical area) anga chhût chuan Lakshadweep (91.33%) chu pakhatna niin, Mizoram chu pahnihna (85.34%) a ni bawk," a ti a; ramngaw humhalh kawngah Mizo mipui an ṭhangharh mek chu lawmawm an tih thu an tarlang bawk.

GMN general body meeting hi president VL Hruaizela Khiangte-in a kaihruai a, hruaitu thar an thlan nghal a ni.