Bawlhhlawh paihna hmun a kang

Aizawl khawpui bawlhhlawh ṭawihthei lo (dry waste) paihna hmun Solid Waste Management Center (SWMC), Tuirial chu March 26, Nilaini khan a kang a, Fire & Emergency Services department leh AMC-a thawktute'n theihtawp an chhuah hnuah nimin khan ṭhelh mih a ni a; heivang hian SWMC hi vawiin aṭangin hawn leh a ni ang.

AMC chuan bawlhhlawh paihna hmun kang chungchangah hian March 26 khan thuchhuah siamin, "Kang ṭhelh hna tibuai lo tur leh kangmei chhuak avanga chhiatna nasa zawk thleng thei veng turin SWMC hi khar rih (temporarily closed) a ni a; thuchhuak awm leh hma chu bawlhhlawh paih theih a ni lo ang. Hei hian PPP mode-a Local Council kaltlanga khawn leh private bawlhhlawh paih zawng zawng a huam. Tin, SWMC, Tuirial chhungah phalna nei loin tumah luh phal a ni lo a, ragpicker leh scrap dealer-te pawh luh phal a ni lo. He khapna hian sorkar leh AMC official, kang ṭhelh hna thawktute a huap lo ang," an ti.

Bawlhhlawh paihna hmun khar lailawk a nih avang leh khar hun chhung tur hriat theih a nih loh avangin Aizawl khawpui chhungah bawlhhlawh lo khawn rih lo turin Local Council zawng zawngte hriattir an nih thu tarlangin AMC chuan, mipuite chu mahni inah ṭha taka bawlhhlawh lo khawl tha rih tur leh tuiluan kawr leh lui dungah te, paihna hmun tur ni loahte paih lo turin an ngen nghal.

AMC hian nimin khan thuchhuah siamin, "SWMC, Tuirial kang chu thunun a nih tak avangin March 28, 2025 aṭangin hawn tawh tur a ni. Amaherawhchu, chhiatna thleng leh palh thei laka invenna turin AMC thawktute leh bawlhhlawh phur motor driver leh helper-te chauh SWMC, Tuirial ah hian luh phalsak an ni ang. Rag picker leh pawn lam mi tumah luh phal a la ni lo. Bawlhhlawh ṭawihthei lo kara bawlhhlawh ṭawihthei awmin bio gas siamin, kangmei nasa tak a siamchhuak thei a; chuvangin bawlhhlawh ṭha taka thliarhrang ṭheuh turin mimal tinte kan ngen a ni," an ti.