Khawzawl district-in an lawmman dawn an lawm

Urban Development & Poverty Alleviation (UDPA) department buatsaih District Beautification Competition-a lawmman pakhatna dawngtu Khawzawl district chuan nimin khan lawman pakhatna an dawn lawmna leh project khuhhawnna hun DC Office tualah an buatsaih a, UDPA minister K Sapdanga'n a hmanpui.

UDPA Minister chuan, District Beautification Competition chu inelna dangte nen khaikhinin inelna danglam tak a nih thu a sawi a, "Pakhatna nihna chuan bulṭanna a entir chauh a ni. Inelna lawmmanah pawh Mizoram chhunga inelna lawmman tam ber tih theih turin pakhatna aṭanga pathumnate hnenah cheng nuai 50 ṭheuh pek chhuah a ni. He pawisa hmanga Khawzawl khawpui an cheimawina turah mipuite duhsakna sang ber ka hlan," a ti.

Khawzawl district-in lawmman a dawn theihna tura ṭhahnemngai taka thawktu District Administration leh District Urban Development Office (DUDO) te a lawmpui thu sawiin K Sapdanga chuan, an sum dawnte chu ei bo mai tur ni loin, khawtlang leh district headquarters cheimawina tur a ni tih hre turin a chah a, an ruahmannate tihlawhtling turin sorkar pawh an hnungah a awm zel dawn tih a sawi.

Khawzawl DC K Vanlalṭhiana pawhin thu sawiin, "District Beautification Competition-a Khawzawl tana ṭhahnemngai taka thawktu DC Office leh DUDO Office a thawktute tanhona leh an zavaia an thawhrimna rah a ni," a ti a, district cheimawina kawngah kalkhawmte chu inlungrualna, inhmangaihna leh inlainatna thinlung pu chunga bul ṭan puiah a sawm a; district mawi leh changkang ber siam turin Khawzawl district mipuite pawh an thawhpuina a ngen nghal.

District Beautification Com-petition 2025 hi State Priority Project hnuaiah district lama official-ten an district headquarters chei mawi nan leh khawpui ṭhang zela an district ṭheuha hmasawnna daihrei an neih theihna tura duan a ni. Competition hi December 17, 2024 ah kick-off a ni.

District tin hian an khawpui cheimawina tur leh thawmṭhatna tur hrang hrang atan District Beautification Detailed Project Report an buatsaih ṭheuh a, inbuatsaihna tur hian December 17,2024 aṭanga February 26, 2025 thleng hun pek an ni. February 27, 2025-ah DPR thehlut felin, February 28-ah district tinin project presentation an nei. He inelna endik tur hian Mizoram University-a Department of Planning & Architecture aṭanga mi thiam tak takte ruat an ni.

Endik tura ruatte hian March 3, 2025 aṭanga endikna (on-field assessment) ṭanin, March 12, 2025-ah endikna hi zawhfel a ni. District tiṭha zual pathum (top three winners) lawmman hian Rs 50,00,000 a keng tel a, participatory prize-in Rs 2,00,000 a keng tel ṭheuh bawk.