Bana Kaih scheme hnuaia society-te hi kut hnathawktute mahnia an din theihna tura ruahman a ni - PC Vanlalruata

Mizoram State Cooperative Union (MSCU) chuan nimin khan an training hall-ah golden jubilee an lawm a, Cooperation minister PC Vanlalruata'n hmanpuiin, Bana Kaih scheme hnuaia society hrang hrang dinte chu kut hnathawktute mahni kutkea an din theihna tura ruahman a nih thu a sawi.

PC Vanlalruata chuan MSCU chu cooperative society ṭha siam tura mawhphurhna lian tak nei a nih thu a sawi a, "Bana Kaih hnuaiah hian thlai thar lei leh thil dang dangte kan ti mek a, tunah hian kan bulṭanna hi a la felhlel a, ala tê deuh bawk. Amaherawhchu, society hman ṭangkai kan tum avangin sawhthing leh hmunphiah bikah pawh society din vek tur kan ti a, an indin ve zel. Hetia kan tihchhan chu Mizoramah society network ṭha tak neih theih kan duh a, kut hnathawktute pawh chu'ngah chuan lo inzira, an mahni kut kea an din theihna turin ruahmanna kan siampui a ni," a ti.

Hmunphiah leh sawhthingah secondary collection centre 67 a awm mek thu sawiin Minister chuan, "Multipurpose Primary Agricultural Credit Cooperative Society (M-PACS) anga kalpui a, an huamchhung ṭheuha thlai tharte lo buaipuiin, kum 5 a vei hnuah chuan Mizoramah hian M-PACS ṭha tak tak kan neih theih kan beisei. Primary society-te pawh kan tuaihnum chho dawn a, kan ramah hian society ṭha, kut hnathawktute leh ram sum leh pai dinhmunin a zar a zo theih tur sorkarin ruahmanna a nei chho mek," a ti a, hemi hlawhtlinna tur hian a kawng a awlsam dawn loh thu leh MSCU chuan mawhphurhna lian tak a neih thu a sawi bawk.

He hun hi MSCU president K Lalchamreia'n a kaihruai a; Cooperaton Minister hian jubilee souvenir a tlangzarh bakah, khualzahawm John LT Sanga, Cooperative Societies registrar leh MSCU founder Lalbiakthanga Pachuau-ten thu an sawi a; tlaiah jubilee ruai kilho a ni.

MSCU hi March 29, 1975 khan din niin, a din chhan leh tum ber chu Mizorama cooperative society-te hmasawn zel theihna tura zirtirna (education & training) pek leh a ṭul dan ang zela district leh state huapa seminar leh workshop buatsaih a ni. An dincham hi kuminah Inrinni a nih avangin nimin khan jubilee hi an lawm a ni.