KHAWTHLIR

MJA inkhawmpui

Mizoram Journalist Association (MJA) chuan vawiin chawhma dar 11 hian Champhai IPR Auditorium-ah inkhawmpui an hmang dawn a, MJA president hlui K Sapdanga, minister chuan a hman pui ang. Chawhnu lamah ro an rel dawn a ni.

Orientation training

Mizoram Bana Kaih (Handholding) Scheme hnuaia Siaha district aṭanga progress partner tura thlan mi 25-te pualin nimin khan orientation training neih a ni a, DRDO project director M Misael in a kaihruai. Progress partner 25-te hi department paruk hnuai mite niin, Bana Kaih Scheme, finance, accounting leh banking chungchanga hriattur pawimawhte mithiamten an hrilhfiah a ni.

Saitual CMO tlawh

Health & Family Welfare minister Lalrinpuii chuan nimin khan Saitual district Chief Medical Officer office a tlawh. Health Minister chuan Saitual District Hospital-in a mamawhte chu ziaka a hnena thlen turin damdawi-in hotute a chah a, hma an sawn zel theih nan theihtawp chhuahpui a inhuam thu a sawi. Medical officer-te chuan an harsatna leh mamawhte an thlen nghal a ni.

Computer leh printer pe

Khawzawl DC K Vanlalṭhiana chuan nimin khan North Eastern Electric Power Corporation Limited (NEEPCO), Tuirial CSR kaltlanga dawn Rs 15,36,900 man computer 10 leh printer cum scanner 10 chu Khawzawla Education department hnenah a hlan. Heng computer leh a kaihhnawihte hi Khawzawl district-a sorkar sikul zinga computer leh printer nei lote hnenah sem tur a ni.

Zonal officer training

Aizawl District Disaster Management Authority (ADDMA) hnuaia zonal officer-te puala buatsaih ni hnih awh tur training chu nimin khan ṭan a ni a, ADDMA chairman Lalhriatpuia, bawrhsapin a hmanpui. Training-ah hian DM Act, 2005, Geological aspects of Aizawl district, soil mechanics, slope stability, basic geology of Aizawl district, functions & role of zonal officers & reporting system leh financial assistance under SDRF & SDMF chungchangte an zir dawn a ni.