Minister-in Mizo ṭawng zirhona hmanpui

Higher & Technical Education (HTE) minister Dr Vanlalthlana chuan nimin khan Aizawl West College auditorium-ah Aizawl West College-a Skill Development Cell leh Internal Quality Assurance Cell-te buatsaih Mizo ṭawng hman dan leh ziah dan zirhona a hawng.

Dr Vanlalthlana chuan, social media-ah Mizo ṭawng hmang dik lo an tam chu a vei thu a sawi a, "Ziakmi leh zirmite thu leh hla hi mi nawlpuiin kan zawm tur leh kan zir tur a ni. Mizo ṭawng kaihhnawih pawl hrang hrang - Mizo Academy of Letters, Mizo Writers’ Association leh Mizo Grammar Association bakah, sorkar lamah kum 2022 aṭangin Mizo Language Development Board (MLDB) chu School Education department hnuaiah din a ni," a ti a, kohhran leh mi mal ṭhahnem ngaite pawhin nasa taka hma an lak mek thu a sawi.

Zirhona hi chawlhkar khat awh tur a ni a, hawnna inkhawm hi Skill Development Cell chairperson Dr Janet Vanlalhlimpuii'n a kaihruai. Aizawl West College vice principal Samuel VL Thlanga, Dr R Lalsangpuii, Prof. Benjamin Lalrinsanga, associate professor Lalengzauva leh PUC asst. Prof. Vanlalruati ten thu an sawi bawk.