Indigenous Games-ah Aizawl champion

DD Mizoram Indigenous Games 2024-25 Grand Finale chu March 21, Zirtawpni zan khan Chaltlang Field-ah zawh a ni a, Sports & Youth Services minister Lalnghinglova Hmar-in khàrna hun a hmanpui. Mizo infiamna chi nga hmanga inelnaah medal 16 latu Aizawl district chu district champion an ni.

Lalnghinglova Hmar chuan, Mizoram pum huapa Mizo infiamna hmanga inelna buatsaih a ni chu ṭha a tih thu a sawi a, "Mizo hnam ziaráng vawn nun leh theh lârna tura hmalakna ṭangkai tak a ni a, he hmalakna avang hian Mizo ṭhangthar tam takin Mizo infiamna an hmelhriat phahin an ngaihhlut phah ngei ka beisei," a ti.

DD Mizoram Indigenous Games 2024-25 hi Broadcasting Infrastructure & Network Development (BIND) leh Mizoram Indigenous Games Association buatsaih a ni a; February 20, 2024 khan Serchhip district-ah ṭan niin, district tinah buatsaih a ni. Inelnaah hian YMA branch 131 aṭangin infiammi 2,290 an tel.

Intihsiaknate chu - mipa tan insaihruipawh, insuknawr, inarpathai leh inbuan a ni a; hmeichhe tan inkawibah a ni. Champion Aizawl district-in medal 16 an la a, Saitual district leh Kolasib district ten an dawt a ni.