LMC BoC-in thil pawimawh an rêl

Lunglei Municipal Council (LMC) Board of Councillors (BoC) chu an chairman Lalzuithanga kaihhruaiin March 21, 2025 khan BoC Hall-ah an ṭhukhawm a; Lungleia park pathum - Laldenga Park, District Park leh Lunglei Park te chu LMC hnuaia enkawl a nih theih nan hmalak an rêl.

Ṭhutkhawmah hian sum kum 2025-26 chhunga Property Tax floor rate atan kum 2024-25-a hman lai 3.42% chu hman zui an rel a; Lunglawn rama Solid Waste Management Centre sak mek chu a hma thei ang bera zawh a nih theih nan hmalak ni se, an ti.

Pawl leh mimal anga tui la chhuak tura lei verh chu khap ṭha tih an ti a, sorkar dan awm sa zûlzuia hmalak zel dan tur zir chiana ennawn leh ni se, an ti a; LMC huam chhungah chhiarpui (demographic census) buatsaih a nih theih nan Directorate of Economics & Statistics-ah bawhzui ni se an ti bawk.

LMC BoC meeting-ah hian vice chairman K Lalrinawma leh chief executive officer Donny Lalruatsanga, executive councillor-te leh councillor dangte an tel ṭha hle a ni.

LMC BOC ROREL DANGTE

▶ Kumin 2025 Krismas bazar siam tura hma la turin Task Force Committee on Krismas Bazar din a ni.

▶ Krismas 2025 vuakveta khawlai leh kâwn chei inelna buatsaih.

▶ LMC chhunga mela, flying business, road show, exhibition, music festival leh a kaihhnawihte chu LMC Licensing Regulations, 2024 hnuaia rîn luh belh a nih angin, phalna pek leh khuahkhirh kawngah a ṭul anga hmalak zui ni se.

▶ LMC Display of Advertisement & Hoardings Regulations, 2024 hnuaiah kum 2025-26 aṭangin hoarding chu tender system-a kalpui an rel a; LMC huam chhunga veng hrang hrang chu zone-ah ṭhena hoarding leh no hoarding zone kalpui a ni ang.

▶ LMC Award (ward fai inelna) endikna zawh a nih tawh avangin lawmman sem thuai ni se.