Minister-in Young Indians hun hmanpui

Confederation of Indian Industry (CII) hnuaia Young Indians (Yi) North East Regional Council Meeting chu March 22, Inrinni khan Aijal Club-ah neih a ni a; Labour, Employment, Skill Development & Entrepreneurship (LESDE) minister Lalnghinglova Hmar-in a hmanpui.

Lalnghinglova Hmar chuan, Young Indians chu ṭhalaite hui khawmtu pawl ṭangkai leh kawng hrang hranga ṭhalaite kawng kawhhmutu a nih thu a sawi a, "Young Indians-te thil tum leh hmalakna hi Mizoram sorkarin ṭhalaite tana hna a thawh tum dan nen a inmil hle," a ti a; hmarchhak state hrang hrang aṭanga ṭhalai hruaitu kal khawmte an khawtlang leh an state-ah hmasawnna atan ke pênnaa hma hruaitu ni turin a chah.

LESDE Minister chuan, Young Indians hmalakna pawimawh tak pakhat chu - ram chhung ṭhalaite tan inhriat tawnna leh inpawh tawnna siam a nih thu a sawi a; ṭhalaite'n themthiamna an neih theih nana hmalakpui chu sorkarin a ngaih pawimawh thu a sawi bawk.

Meeting hi Yi Chapter Mizoram chair Robert Rohmingliana’n a kaihruai a; Yi Regional (NE) chair Christine L Sailo leh Yi National vice chairman Arun Rathod te pawhin thu an sawi bakah, thupui 14 hmangin mithiamte'n thil pawimawhte an sawi.

Young Indians hi India rama industry lama hma latu pawl lian ber zinga ngaih Confederation of Indian Industry hmalakna a ni a; India rama state hrang hrangah Yi chapter 70 chuang awmin, member 7,000 vel an awm mek a ni.