Aizawl khawpuia YMA branch-te'n 'Ruihhlo Do Hnatlangpui' an nei

Central YMA ruahman angin March 22, Inrinni khan Aizawla YMA branch hrang hrangte chu 'Ruihhlo Do Hnatlangpui' neiin an thawk chhuak a; ruihhlo eng emaw zat an man.

CYMA hruaitute hnen aṭanga thu dawn danin, Ruihhlo Do Hnatlangpui hi kum 2024-a YMA Rorel Inkhawmin 'Ruihhlo do kawngah YMA-in tun aia chak zawkin hma la rawh se' tia a rel bawhzuina a ni a; Aizawla YMA branch tinte chu an huam chhung ṭheuhah an hnatlang a ni.

Ruihhlo do hnatlangah hian YMA branch tin hmalak dan a inang vek lo a; ruihhlo ṭhat lohzia tarlanna poster an târ te, ruihhlo ngaite awm khawmna hmun tihfai te, ruihhlo ngaite koh khawma conselling neihpui te, tleirawl koh khawma ruihhlo chungchang leh HIV/AIDS chungchang inzirtirna hun hmante kalpui a ni. Branch ṭhenkhatin ruihhlo an dap a, ruihhlo eng emaw zat man a ni bawk.

Aizawlah YMA branch 109 a awm mek a; veng chhunga chhiat tâwk an awm avang leh hun ruat dang neih lâwk vanga March 22-a hnatlang ve thei lo an awm a, chu'ngte chuan hun remchangah hnatlan an tum thu CYMA hruaitute chuan an tarlang.

CYMA chuan, ṭhahnemngai taka ruihhlo do hnatlang kalpuitu YMA branch-te chungah an lawm thu an sawi tarlang a; an huam chhung ṭheuhah thâ thlah loa ruihhlo do hnatlang kalpui zel turin an chah bawk.