District chei mawi ber Khawzawl district

Urban Development and Poverty Alleviation (UDPA)-in a buatsaih, district chei mawi inelna, District Beautification Competition chu March 21, 2025 khan result puan a ni a, UDPA minister K Sapdanga'n a hmanpui. District chei mawi ber atan Khawzawl district thlan a ni.

District Beautification Competition result puanna hi IPR conference hall-ah buatsaih a ni a; minister K Sapdanga chuan, "District Beautification Competition danglamna chu, competition dangah chuan result puan hi a hmawrbàwkna a ni ṭhin a, he inelnaah hi chuan result puan hi a bul kan ṭanna chauh a ni. Lawmman dawngtute'n an lawmman dawn hi an DPR-te a tak ram an chantir theih nan bul ṭan nan hman tur a ni," a ti.

K Sapdanga chuan, district tinte inpekna leh thawhrimna fakawm a tih thu sawiin, "He inelna hian district tinah ngaihtuahna thar leh hmasawnna rahbi thar min kaipui ngei kan beisei tlat a ni," a ti a; lawmman dawng lote chu beidawng loa hma la zel turin a fuih.

Inelnaah hian district ti ṭha zual pathumte'n lawmman Rs 50,00,000 ṭheuh an dawng a, district tel dangte'n participatory prize Rs 2,00,000 ṭheuh an dawng. Lawmmante leh hmalakna hrang hrang atana hman turin District Beautification Competition budget chu Rs 1,70,93,000 a ni.

UDPA director Jacob Lalawmpuia tarlan danin, District Beautification Competition hi state priority project hnuaiah district official-te'n an district khawpui chei mawi nan leh khawpui ṭhang zel kara an district ṭheuha hmasawnna daih rei an neih theihna tura duan a ni. Inelna hi December 17, 2024 khan hawn a ni a, district tinin an khawpui chei mawina tur leh thawm ṭhatna tur hrang hrang atan District Beautification Detailed Project Report an buatsaih.

Inbuatsaihna hun December 17, 2024 aṭanga February 26, 2025 chhung hawn a ni a, February 27, 2025 khan district tinin an DPR-te an thehlut kim. February 28-ah district tinin project sawifiahna hun an hmang a; Mizoram University-a Depart-ment of Planning & Architecture mithiamte'n an endik a ni.

District Beautification Competition result puannaah hian Serchhip, Khawzawl leh Kolasib DC-te pawhin thu an sawi a; judge aiawhten an endik dan an sawi bawk.

Beautification Competition Result

1-na Khawzawl district

2-na Siaha district

3-na Serchhip district