KHAWTHLIR

Thisen pe

March 22, Inrinni khan Tuipuiral Zirlai Pawl chuan Civil Hospital, Aizawl tan thisen unit 57 an pe a, petute mipa 45 leh hmeichhia 12 an ni. ṬKP, Muallianpui Pastor Bialin Muallianpui High School-ah thisen pek huaihawtin, Lunglei Civil Hospital tan thisen unit 74 an pe a, petute mipa 63 leh hmeichhia 11 an ni a; ṬKP, Siaha East Pastor Bial pawhin Siaha District Hospital tan unit 24 an pe a, petute mipa 16 leh hmeichhia pariat an ni.

Kuhva rah man

Assam Rifles sipaite chuan March 21, 2025 khan Champhai Zote leh Ngúr inkar ramhnuai an dapnaah Myanmar aṭanga lak luh kuhva rah ip 180 an hmu chhuak. Kuhva rahte hi Champhaia Customs Preventive Force hnenah an hlan a ni.

Zawlpala Thlantlang

YMA, Chhimphei Group-in Phulpuia group conference an hman turah March 28, 2025 (Zirtawpni) khian Zawlpala Thlântlangah hun hman a nih dawn avangin hemi ní hian Zawlpala Thlantlang thlawh theih a ni dawn lo tih YMA, Phulpui Branch chuan thuchhuah siamin an tarlang.

MLA-in hawng

Aizawl South-II bialtu MLA Lalchhuanthanga chuan a bial chhung, ITI Venga a MLA fund hmanga basketball court siam chu March 22, Inrinni khan a hawng. Basketball court hi Rs 3,70,000 sênga siam a ni.

Buhhûm quintal 1,399.61 lei tawh

Mizoram sorkar chuan sorkar kum kal mekah Mizorama thar buhhûm quintal 1,399.61 a lei tawh a, chuta tan chuan cheng nuai 41.98 sen a ni. Mizorama thar buhhûmte chu Kolasib district-a OmOm Modern Rice Mill, Pangbalkawnah December 19, 2024 khan lei ṭan a ni a, kg. khat Rs 30-in lei ṭhin a ni.

Sawhthing chi sem

Hnahthial district-a Darzo, Thingsai, Bualpui H, New Ngharchhip leh Cherhlun khuaa kut hnathawktu mi 275 hnenah March 22, Inrinni khan Mission Organic Value Chain Development for North East Region kaltlangin sawhthing chi quintal hnih ṭheuh sem a ni. Tun karah South Vanlaiphai, Muallianpui leh Khawhri khuaa mi 225 hnenah quintal hnih ṭheuh sem leh tum a ni bawk.