KHAWTHLIR

Bill pek kim loh 11

Assembly budget session neih zawh takah PWD minister Vanlalhlana chuan MNF member Lalrinsanga Ralte zawhna ziaka chhangin, SASCI (Special Assistance to States for Capital Investment) hnuaiah hna thawh zawh vek tawh, bill la pek kim loh 11 a awm thu a tarlang a, "Sum sanction a nih veleh pek an ni ang," a ti.

Zangnadawmna pe

Aizawl District Disaster Management Authority chuan March 12, 2025-a chenna in kang ral ta neitu K Lungmuana s/o Zauthanga (L), Chawnpui, Aizawl hnenah zangnadawmna Rs 1,30,000 an hlan.

Heroin man

Assam Rifles leh Excise & Narcotics department, mite mite chuan March 20, Ningani khan Lungleiah mi pahnih hnen aṭangin heroin (no. 4) gram 34.94 an man. Lungleia Excise & Narcotics department chuan thubuai an ziak lut a ni.

Innovation challenge

Chief minister Lalduhoma hoin nimin khan a pisaah Chief Minister's Bána Kaih Innovation Challenge kalpui meka inter-departmental challenge hnuaia project 20 lut zinga a ṭha zual parukte an thlirho a, he'ng aṭang hian lawmman dawng tur pathum thlan a ni ang.

Kawlphetha awm dawn lo

Power & Electricity department chuan vawiin hian power sub-station pathumah hna an thawk dawn a, hei vang hian Aizawl khawpui chhung leh Chhimphei tlangdung khaw hrang hrangah kawlphetha pek a ni dawn lo.

MSPMC ṭhukhawm

Mizoram State Project Monitoring Committee chuan nimin khan General Body Meeting vawi 5-na an nei a; vice chairman Lal Rinawma'n kaihruaiin, hmalak tawhna leh hmachhawpte an thlirho. MSPMC hian kum 2024 chhung khan project 38 an endik tih tarlan a ni. MSPMC member term hi kum khat zel a ni a, February 2025 thleng kha term khatna niin, March 2025 aṭangin term hnihna a inṭan a, member 28 an awm mek.