Champhai district chhunga sawhthing qtl 4,509.7878 lei nan nuai 225 pe tawh

Champhai district-ah sawhthing chíngtu mi 834-te sawhthing quintal 4,509.7878 lei nan sorkarin cheng nuai 225 a pe tawh a; Champhai district-a sawhthing dah khawmna secondary collection centre (SCC) pariatah sawhthing qtl. 3,616.58 a awm mek.

Champhai District Agriculture Marketing Committee (DAMC) buatsaihin nimin khan Champhaia District Education Training Hall-ah assistant district agriculture officer (ADAO) Vanlalnunpuia kaihhruaiin Champhai district-a SCC leh cluster society hotute tan sawhthing lei chungchang inhrilhfiahna buatsaih a ni. Mizoram Agriculture Marketing Board (MAMB) member Lalnunpuia leh DAMC co-opted member Laldanmawia ten thil pawimawhte an zirtir a, zawhna leh chhanna hun hman a ni.

Tarlan danin, Bána Kaih (Handholding) scheme hnuaia thlai thar lei kalpui mekah February 20 aṭanga March 13, 2025 thleng khan Champhai district-a sawhthing chíngtu mi 834 hnenah an sawhthing qtl. 4,509.78 leina man Rs 2,25,48,939 (nuai 225) pek a ni tawh.

SCC aṭanga sawhthing leite dah khawmna (buffer stock) Sairang kudama thawn tawh sawhthing qtl. 2,216.69 leina man Rs 1,10,83,450 (nuai 110) pek hmabak a la awm a; Champhai district-a SCC pariatah sawhthing qtl. 3,616.58 dah khawm a la awm mek bawk.