World Oral Health Day hman a ni

National Oral Health Programme huaihawtin nimin khan Directorate of Hospital & Medical Education auditorium-ah World Oral Health Day hman a ni a, Health & Family Welfare minister Lalrinpuii'n a hmanpui. Kum 2017 - 2022 chhung khan Mizoramah ka chhung cancer 1,105 an awm thu tarlan a ni.

World Oral Health Day hi March 20 a ni a, remchan zawkna vangin nimin khan hman niin, Hospital & Medical Education director Dr Eric Zomawia'n a kaihruai. Kumina Day thupui chu ‘A happy mouth is.. a happy mind’ tih a ni.

HFW minister Lalrinpuii chuan, Mizorama damdawi-in leh health centre hrang hranga dental OPD-te chu a theih anga tam pana hmang ṭangkai turin mipui a chah a, "Zûk leh hmuam tih loh hi inzirtir uar sauh sauh ila, nu leh pate pawhin kan fate zûk leh hmuam ti lo zel turin i zirtir ang u. Zûk leh hmuam inṭheh kan chìnte pawh hi sim a ngai," a ti a; ei tur hrisel ei uar zel turin Mizoram mipui a chah.

World Oral Health Day hmanna inkhawma National Oral Health Programme nodal officer Dr F Lalrimawii tarlan danin, kum 2017-2022 chhung khan Mizoramah ka chhung cancer mi 1,105 an awm a; kum 2024 chhungin sorkar damdawi-in hrang hrang dental OPD-ah mi 72,005 an inentir a ni.