Thlan tlin hmeichhiate inzirna buatsaih

Mizoram State Legal Service Authority leh All Mizoram Women Elected Representative chuan nimin khan IPR Auditorium-ah 'Capacity building & leadership training for elected women representatives' an buatsaih a, chief minister Lalduhoma'n a hawng.

CM Lalduhoma chuan, dan hriat leh zawm a pawimawh thu a sawi a, "Ram leh khawtlang hruaitu chu dan hnuaia hna thawk tur an ni a, dan an hriat ve a ngai ṭhin. Dan hriatna lama mi a bengvar tâwk loh chuan dan kalha thusawi emaw, hmalak maite a hlauhawm a, mipui chanvo humhalhna kawngah te, inrelbawlna langtlang leh huapzo kalpui theih nante a ṭangkai vek a ni," a ti.

Dan lam inzirtirna chu mi tin mamawh a nih thu sawiin Lalduhoma chuan, "Dan tharte a lo chhuak ṭhin a, tun hnaiah pawh dan thar eng emaw zat India ramin kan nei. Dan thar lo chhuakte hi kan lo hmelhriat ve thuai a ṭul ṭhin," a ti a; rorelnaa thlan tlin hmeichhiate chu hmeichhia zawng zawng aiawhtu an nih thu sawiin, hmeichhiate tihchakna leh hamṭhatna lama hmalaknaah sorkar tibengvartu ni turin a chah.

Inkhawm hi All Mizoram Elected Women Represenratives president R Zomuanpuii'n a kaihruai a, MSLSA member secretary Vincent Lalrokima leh All Mizoram Women Elected Representative general secretary Florence Vanlanrengpuii ten thu an sawi. Chawhnuah thupui hrang hrang zirho a ni.