Pawi khawihna tuartu mi 14 hnenah zangnadawmna hlan

Aizawl District Legal Services Authority (ADLSA) chuan nimin khan Aizawl District Court-a Judge Meeting Room-ah pawi khawihna tuartu mi 14 hnenah zangnadawmna an hlan.

Crime victim compensation semna inkhawm hi Aizawl District & Sessions judge Helen Dawngliani, ADLSA chairman hoa hman a ni a; mi kut tawrh vanga thi leh kum tling lo pawngsual tâwk mi 14 hnenah zangnadawmna Rs 41,00,000 sem chhuah a ni.

Helen Dawngliani chuan, pawi khawihna tuartute hnena zangnadawmna pek ṭhin chu tih ngai lo se an duh ber tih sawiin, "Mi pawikhawihna vanga hetiang hun hman a ngai ṭhin hi a pawi tak zet," a ti.

ADLSA Chairman chuan, zangnadawmna sem chu sorkarin ṭha tura a tih a ni tih hre reng turin a dawngtute a chah a, "Kan sum leh pai dawn hi chhungkua emaw, mimal emaw kan dam khawchhuah nan, nunphung pangngai kan lo zawh leh theih nan ṭangkai taka kan hman hi kan tih tur a ni," tiin, chu chu sorkar pawhin a phût a nih thu a sawi.

Zangnadawmna semna hunah hian chief judicial magistrate Lalrochami Ralte, ADLSA secretary-in zangnadawmna pek dan kalphung a sawi a; pawi khawihna tuartu ṭhenkhat chhungte'n thu an sawi bawk.