YMA, Tuiphal Group-in inkhawmpui hmang

YMA, Tuiphal Group chuan March 20, Ningani aṭanga nizan thleng khan Khawkâwnah inkhawmpui vawi 49-na an hmang a, Central YMA general secretary Prof. Malsawmliana'n a hmanpui. Tuiphal Group chhungah hian YMA branch pasarihah member 6,316 an awm.

Nimina vantlang inkhawmah Prof. Malsawmliana chuan, tlang hrang hranga Zo fate inpumkhat tura pawl hrang hrangin hma an lak mek laia unau inkarah harsatna a awm leh ṭhin chu pawi a tih thu a sawi a; Mizote chu an la tlem avangin inlungrual lo tham an ni lo a, mahni hnam bil ngaihtuah loa Zo fate ṭhatna tur ngaihtuah hmasa turin YMA member-te a chah.

CYMA General Secretary chuan, YMA kalphung a inher hret hret a nih pawhin a din chhan - ṭanpui ngaite ṭanpuitu tih chu vawng tlat turin YMA member-te a chah a, "YMA thianghlimna, politics rawngkai lo pawl a nih hre reng ila a, hei hi YMA zahawmna a ni. Ram leh hnam ṭhatna tura langah chuan sorkar pawh sawisel a ṭul chuan kan sawisel hreh loh tur a ni a, thawhho a ngaih hunah ṭha taka thawhpui zel tur a ni," a ti.