Ṭamdilah Sangha Kûtpui hman a ni

Nimin khan Ṭamdilah Saitual District Sangha Kûtpui hman a ni a, Fisheries minister Lalthansanga leh bialtu MLA Prof. Lalnilawma, minister of state ten an hmanpui.

Saitual District Sangha Kûtpui Organising Committee buatsaih Sangha Kûtpui hawnna hi Ṭamdil Wetland Interpretation Centre & Herbarium-ah neih a ni a; Ṭamdilah nghakuai chiah rûnpui buatsaih zui a ni.

Minister Lalthansanga chuan, EFCC, Fisheries leh Tourism department-te'n an enkawl Ṭamdilin hma a sawn zual zel theih nan Saitual DC kaihhruai Ṭamdil Management Committee din a nih thu a sawi a, "Hei hian kawng tam takah hmasawnna a thlen theih ka beisei a, Ṭamdil hi khualzin hîp theihna ṭha tak a ni," a ti. Minister hian sanghaa intodelhna tur leh ram chereu tur vên kawngah theihtawp chhuah turin kal khawmte a sawm.

Khualzahawm Prof. Lalnilawma chuan, Sangha Kûtpui chu khualzin hîpna ṭha tak a nih a beisei thu a sawi a, "Saituala tung chíng pawlte tan Horticulture department scheme MIDH hnuaiah brush cutter 10 pek a ni a, Saitual district chuan tung leh Ṭamdil hi lârpui ngei se ka duh," a ti.