Gas bur leh thuk endik thu puang

Food, Civil Supplies & Consumers Affairs (FCSCA) department chuan thuchhuah siamin, Indian Oil Corporation (IOC) hnuaia eirawngbawlna gas bûr leh a kaihhnawih hmanruate endikna (mandatory inspection) neih leh tawh tur a nih thu a tarlang.

FCSCA tarlan danin, LPG Manual version 2.0 Clause 5.3-in a phût angin IOC hnuaia gas connection (domestic) neite hnena mandatory inspection, kum nga chhunga vawi khat tal neih ṭhin tur a nih thu leh, Mizorama LPG distributor-te chu an huam chin ṭheuhah endikna kalpui tura beisei an nih thu a tarlang.

Supply department chuan, "Endikna hian a tum chu gas hmangtute'n pipe hman tur dik tak an hman leh hman loh te, gas bûr (cylinder) hman dan dik leh connection dik takin vuah (fit) a ni em tihte leh, gas thuk (stove) hman phal chin (ISI mark chuang) an hmang em tihte enfiah a ni," a ti.

FCSCA tarlan danin, mandatory inspection-ah hian consumer-te'n pawisa an chawi (service charge) a ngai a, PMUY (free) connection-ah Rs 59 (GST telin) leh connection pangngaiah Rs 236 (GST telin) a ni. Endiktir duh lo tan declaration (format awm sa)-ah hming lo ziah tur a ni a; declaration-a hming ziah duh lote'n gas an dawng chhunzawm lo a nih pawhin an sawi buai thei lo. Endiktute chu consumer-te'n an hriat theih nan uniform an ha tur a ni a, IOC aṭangin identity card an nei ngei tur a ni bawk.