Khawlrinpuii hnenah Zakapa Award hlan

Mizoram sorkar chuan Zakapa Award 2025 chu nimin khan Khawlrinpuii, Khatla South hnenah a hlan. International Women’s Day pualin kawng hrang hranga hmingṭha hmeichhe 33 hnenah chawimawina hlan a ni bawk.

Women & Child Development chuan nimin khan Dawrpui Multipurpose Hall-ah Zakapa Award 2025 semna leh International Women’s Day lawmna an buatsaih a; SWTAWCD minister Lalrinpuii khuallian a ni a, MLA pahnih - Prova Chakma leh Baryl Vanneihsangi te khualzahawm an ni.

Lalrinpuii chuan, NITI Ayog-in Sustainable Development Goal Index a tihchhuaha hmeichhiate dinhmun tehfung awmna SDG 4 enin Mizo hmeichhiate dinhmun chawisan kawngah hmabak thui tak a la awm thu a sawi a, "Hmasawn tur hian chhung tina mipa leh hmeichhia ṭanrualna a pawimawh," a ti.

Minister hian International Women’s Day lawmna puala Mizo lal huaisen, hmeichhiate humhimna kawnga thawh hlâwk Zakapa hming chawia chawimawina siam leh Women's Day puala chawimawina dawng thei tura hmeichhiate dinhmun chawisan kawnga hma latute lawmpuina leh duhsakna a hlan a ni.

Chawimawina hlanna inkhawm hi SWTAWCD secretary Lalzarmawii'n a kaihruai a; WCD director Zoramthangi Chhangte-in report a pe a, MHIP president Ngurmawii Sailo kaihhruaiin International Women’s Day thutiam sawi rual a ni.

International Women’s Day pual hian kawng hrang hranga hmingṭha hmeichhia 33 hnenah chawimawina hlan a ni a; kutkawih eizawnna lamah mi pahnih, Elected Women Representatives huangah mi 15, STEM Education huangah pathum, infiamna lamah mi pariat leh hmeichhe chungchuang bik (hmasa ber nihna nei) panga chawimawina hlan an ni.

Sorkar thuchhuah tarlan danin, Zakapa Award dawngtu Khawlrinpuii, Khatla South hi February 14, 1959-ah Arte khuaah a piang a, a fate nen Khatla South-ah an cheng mek. Zirnaah thleng sang lo mah se, hmeichhia leh naupangte humhalhna kawngah theihtawp chhuahin hma a la ṭhin a; ṭhenawm khawvengah nupa buaina te, fa inchuhte leh harsatna dang a awma an koh ber a ni ṭhin.

Hmeichhia humsual dai, home-a dah ngai buaipui te, naupang home-a dah leh a ṭul anga FIR thehluhte leh mi dangte himna tura Child Welfare Committee, Women Commission leh home hrang hrang tlawhte chu Khawlrinpuii hnathawh langsar zual tarlan a ni a; a hnathawh avangin MHIP Gen. Hqrs pawhin chawimawina a lo hlan tawh bawk.