HSA-in hmeichhe rîkrâptu an dem

Hmar Students' Asso-ciation (HSA) Sinlung Hills Joint Hqrs, Aizawl Joint Hqrs leh Kolasib Joint Hqrs-te chuan thuchhuah inṭâwm siamin, October 26, 2020 zana Sakawrdai nula pawngsual tumtu leh thaha vautu Dr JH Vanlalnunmawia chu a phû tâwk hrem ngei turin thuneitute an phût.

HSA-te chuan, Ratu leh Sakawrdai inkara Sakawrdai nula laka Dr JH Vanlalnunmawia s/o JH Vanlalnela, Ramhlun North, Aizawl chêt dan chu an dem thu sawiin, "Tenawm tak leh mawi lo taka hmeichhe áwmném zawk diriama thah hiala vau a, khawih chhiat a tum leh rûi chunga motor a khalh hi pawi kan tiin kan dem tak zet a ni," an ti.

HSA-te tarlan danin, hmeichhhe chhungte'n October 27, 2020 khan Sakawrdai Police Station-ah FIR an thehlut a, Dr JH Vanlalnunmawia lakah IPC 354/336/341/506 IPC leh MLP Act 6(3) tlawhchhanin thubuai siam luh a ni. Tualthah tum (attempt to murder) thubuai, IPC 307 tlawhchhanin ziah luh tum mek a ni bawk.

Sakawrdai nula chu Dr JH Vanlalnunmawia'n ṭawngkam mawi lo tak takin a ṭawng khum a, hnam inhmuhsitna leh diriamna ṭawngkam a chhâk chhuak nia sawiin HSA-te chuan, "A ná kan ti a, pawi kan ti tak zet. HSA hian Zo fate inpumkhatna turin kan thawhpui MZP, MSU leh hnam pual zirlai pawl dangte nen theihtawp kan chhuah a. Hetianga hnam bil inhmusitna ṭawngkam mawi lo tak hmanga Hmar hnam min diriam hi kan la thu tak hle a, ngaihdam a dil ngei kan phût a ni," an ti.