Aizawl Civil Hospital-ah tui far vangin X-ray leh ultrasound a tih theih loh

Aizawl Civil Hospital (ACH)-a X-Ray leh ultrasound khawlte chu a dahna hmun chung aṭanga tui a far nasat avangin tunlai hian hman theih a ni lo.

X-Ray leh ultrasound tihna hi building khata awm a ni. ACH-a thawktute hnen aṭanga Vanglaini thu dawn danin, X-Ray chu July 20, 2015 aṭangin tih theih a ni lo a, ultrasound erawh hun eng emaw chen a theih ang anga tih a nih hnuah nimin aṭang khan tui a far nasat zual avangin tih chhunzawm a ni lo.

ACH-a thawkte chuan an building chu tun hma chuan a hul ṭhat thu sawiin, "A chung sak a nih aṭangin a phui lo a, tun hnai khan tui a rawn far nasa hle. Tui a far hian khum leh hmanraw pawimawhte a tihhuh bakah, electric current hmun hrang hrangah a kal a, mihring tan pawh a hlauhawm a ni," an ti a; tui far chu a chung bathroom aṭanga far nia an hriat thu an sawi.

He building-a awm ve tho CT Scan room-ah pawh tui a far a, mahse room dang anga a far nasat loh avangin a remchan dan ang angin nimin thleng kha chuan CT Scan an la ti zel a ni.