Chapchàr Kût hlim taka hman a ni: 'Kût hi Zo hnahthlak péng hrang hrang inpumkhatna ní lo ni rawh se' - Kût Pa

Nimin khan Mizoramah Chapchàr Kût hlim taka hman a ni a, Aizawlah chuan Lammualah chief minister Lalduhoma hoin hman a ni. CM chuan, Kût chibai bûkna thu sawiin, Chapchar Kût chu Zo hnahthlak péng hrang hrangte inpumkhatna ní ni se a duh thu a sawi.

Lammuala Chapchar Kût hmannaah hian Chief Minister hi kût pa a ni a, Art & Culture minister C Lalsawivunga chu kût thlengtu a ni. Hnam nunphung, lâm leh zai chi hrang hrang entir a ni a; mimal leh huho zai ngaihthlak a ni bawk.

Kût pa Lalduhoma chuan, Zo hnahthlak chi péng hrang hrang bakah, ṭhenawm statete leh ram pawn lam thlenga hnam làm hmuhnawm tak tak en tur a awm tur chu ṭha a tih thu a sawi a, "He ni hi Zo hnahthlak péng hrang hrangte inpumkhatna ní lo ni rawh se. Kan pipute chuan Chapchar Kûtah hian inhnial leh inhauh a thiang lo an ti a, vawiin hi inremna ní a ni a, tumah intihnat loh tur a ni a, inhau loh tur a ni tih hriain kût i hmang ang u," a ti.

Chapchar Kût thupui 'Zo nun ze mawi - hawihhawmna; tih chu kawng hrang hranga lantir theih a nih thu sawiin Lalduhoma chuan, "A pawimawh ber pakhat chu ṭawngkama hawihhâwmna a ni," a ti a; Mizo pi pute'n 'Ṭawngkam ṭhain sial a man' an tih te, 'Lampui chang khatah mi an be chhe ngai lo,' an tihte chu hre reng turin mipui a chah.

Chief Minister chuan, Mizo pi leh pute an ṭawng fimkhur ṭhin thu sawiin, "Ṭwng chaltlai hmante an duh ngai lo; chapo leh ṭawng uang an pumpelh ṭhin. Keini pawhin social media hrang hrangahte ṭawngkam hawihhawm hmang turin vawiin aṭang hian kan ngaihtuahna i siam thar ang u," a ti.

Puipunnaah zu rûi hmuh tur an tlem tial tial tih sawiin Kût Pa chuan, "Puipunnaa zu rui buai nih hi mi mâwl nihna a ni a, i sim hmak ang u," a ti a; kut hmannaa mi tam tak pung khawm zingah zu rui buai an awm loh a beisei thu a sawi.

Lalduhoma chuan, hawihhâwmna leh tlawmngaihna chu lâk hran theih a ni lo tih sawiin, "Zo nun ze mawi hawihhawmnain a ken lian tak chu aia upa zah a ni. Chaw kan ei khawm ṭhin a, ruaite kan ṭheh a, hengahte hian kan Zo nun ze mawi - aia upate bàr khalh loh tihte hi kan hriat thar leh a ṭha," a ti a; aia upa zahna an theih chin chinah lantir zel turin mipui a chah.

Hawihhawmnain mi dangte mitmei vèn a keng tel tih sawiin CM chuan, "Vantlang kawng leh hmunhmate tihbawlhhlawh an duh ngai hauh lo. Tunlaiah in sakna bungrua te, motor park te, bawlhhlawh paih thuahte kan pipu hawihhâwmna kan hriat thar a ṭha hle," a ti.

Kût Pa chuan, zan reiah bike-a ring tak taka khawlaia tlân chu Mizo pi pute'n an duh loh ang chi a nih thu sawiin, "Traffic rule zâwm ṭha ila. Aizawl hi silent city. no honking city tia hriat lâr kan ni. Hawihhâwm taka traffic rules zâwma horn kan hmet ngai mang lote hi hnam dang laka min timawitu a ni," a ti a, hawihhawmna avanga hnam dang laka Mizo tihmawinate chu chhunzawm zel turin mipui a chah.

Mizote'n lui dungrte leh nungchate túrin an hrai ṭhin tih sawiin, "Kan tichereu mek a, kan ram nungchate hi an rûm mek. Thil siamte hian Pathian fate lo lan hun nghakhlel takin an thlir a ni. Kan ram leilung, thing leh mau, lui leh tlangte nungcha thil nung awm zawng zawng hi i duat thar leh ila, he hawihhawmna ní kan hman hi i hmang ṭangkai ang u," a ti.

Chief Minister chuan tun hma chuan Chapchar Kût atan sum awm sa a awm loh avangin a rem rem pawt khawmin hman ṭhin a nih thu a sawi a, "Tunah chuan kan sorkarin Chapchar Kût atan bik budget a ruahman ta," a ti a; senso a pun zel avangin sum thawhtu tam tak an awm thu sawiin, an chungah an lawm thu a sawi.

Aizawla Chapchar Kûtah hian kût thlengtu C Lalsawivunga leh Central YMA president C Lalhmachhuana te pawhin thu an sawi a; Mizo hnam péng hrang hrangte'n an hnam làmte an entir bakah, Fiji Cultural Troupe (ICCR), Assam Cultural Troupe leh Naga Cultural Troupe te pawhin an hnam lam an entir. Mimal zaithiam eng emaw zatte an che bawk.