NUHM-in TNT-ah free clinic buatsaih

National Urban Health Mission chuan nimin khan Thutak Nunpuitu Team (TNT) hmunpui, Muanna Vengah a thlawna inentirna an buatsaih a, mi 600 chuangte hriselna dinhmun enfiahin, natna chi hrang hrang hmuh chhuah a ni.

Free clinic nei tur hian National Health Mission hnuaia programme - NUHM, NLEP, NIDDCP, NTEP, NCD leh MSACS-a thawkte aṭangin mi 50 vel an kal. Doctor 10-in TNT-a awmte hriselna dinhmun an enfiah a; an mamawh ang damdawi chi hrang hrang Rs 2,50,000 man vel a thlawnin an sem bawk.

Inentirna ṭan hmain inkhawm tawi buatsaih a ni a, NUHM state nodal officer Dr Lalawmpuia Chhangte-in a kaihhruai. TNT hotu Sangthankima chuan, TNT-a awmte'n a hun taka enkawlna an dawn theih loh ṭhin avangin harsatna tâwk an awm ṭhin thu te, natna an neih pawh an sawi thiam ṭhin loh avangin natna benvawn nei enkawl harsa tak tak an awm ṭhin thute a sawi a; TNT-a awmte hriselna ngai pawimawha free clinic buatsaih a ni chu an lawm thu a sawi bawk.