RTI Act hmangin zawhna a lut ṭha

Nimin khan Siaha DRDO conference hall-ah Siahaa RTI Act hmanga zawhna chhangtu state public information officer (SPIO) leh state assistant public information officer (SAPIO)-te pualin Right to Information (RTI) Act chungchang inhrilhfiahna buatsaih a ni a; kuminah chawhrualin ni tin RTI Act hmangin dilna 19 lut ziah ang a nih thu tarlan a ni.

Zirhona hi Mizoram Information Commission aṭangin chief information commissioner (CIC) John Neihlaia leh MIC secretary H Dolianbuaia ten an hmanpui a; John Neihlaia leh Siaha district bawrhsap VL Hruaizela Khiangte ten thu an sawi a, zawhna leh chhanna hun hman a ni.

John Neihlaia chuan, RTI Act chu mipuiin hlut nachang an hre chho zel tih sawiin, "July 1, 2022 aṭanga RTI Online hman ṭan a nih hnu phei chuan zawhna ṭhahnem tak a lut tawh," a ti a; kumin 2025-ah January 1 aṭanga nimin thleng khan RTI Act hmanga information dilna 1,216 a luh tawh thu sawiin, chawhrualin, ni tin RTI dilna 19 lut ziah ang a nih thu a sawi.

SPIO leh SAPIO-te chu mawhphurhna pawimawh tak chelhtute an nih thu leh RTI Act 2005 leh a kaihhnawih dan leh hraite ngaih pawimawh tur a nih thu CIC chuan a sawi bawk.