Khawzawl district-ah sawhthing kg. 3,10,554 lak khawm a ni tawh

Khawzawlah District Agricultural Marketing Committee (DAMC) chuan March 5, Nilaini khan an chairman K Vanlalṭhiana, bawrhsap hoin Bána Kaih scheme hnuaia thlai thar hralh/lei chung-chang an sawiho. Khawzawl district-a sawhthing leina secondary collection centre parukah sawhthing kg. 3,10,554 (quintal 3,105) lak khawm a nih tawh thu an tarlang.

Ṭhutkhawma tarlan danin, Bana Kaih hnuaiah February 20, 2025 aṭanga March 5, Nilaini thleng khan Khawzawl district-a SCC parukah sawhthing kg. 3,10,554 lak khawm tawh a ni. SSC hrang hrangah sawhthing lak khawm tawh dan chu - Khawzawl SCC-ah kg. 87,758, Puilo SCC-ah kg. 34,713, Khawhai SCC-ah kg. 1,22,939, Rabung SCC-ah kg. 11,536, Chawngtlai SCC-ah kg. 39,055 leh Sialhawk SCC-ah kg. 13,553 a ni.

Sawhthing chu state dang aṭanga leitute hnenah Chawngtlai SCC aṭangin kg. 20,000 leh Khawhai SCC aṭangin kg. 43,332, a vaiin kg. 63,332 hralh a ni tawh.

Ṭhutkhawmah hian sawhthing leina leh hralhnaa kut hnathawktute leh a leitute'n harsatna an tawh dante leh harsatna chinfel dan turte sawiho a ni.