Mualkhang Bottling Plant chei hna thawh ṭan a ni tawh - Supply Minister

Food, Civil Supplies & Consumer Affairs (FCSCA) minister B Lalchhanzova chuan nimina Assembly session-ah Mualkhang Gas Bottling Plant chei ṭhat hna thawh ṭan a nih tawh thu a sawi.

FCSCA Minister chuan, Mualkhang Gas Bottling Plant chu sawina a rei tawh tih sawiin, "Prime Minister hawntir tum a nih thu sawi thâwmte a awm. Kan sorkar hnuah kan han chhui chiang a, chuti maia hawn theih a ni lo. Sorkar hmasa ram pek belh nia sawite land lease pawh a lo la fel lo a, tunah chuan kan tifel tawh," a ti.

ZPM an sorkar hnuah hmalakna a kal chak thu sawiin B Lalchhanzova chuan, "Gas dahna rintlak a nih tawh loh avangin khar a ni. A chei ṭhatna atan cheng vbc. 225 sanction a ni a, chak taka hmalak a ni. A hung hna thawh mup mup a ni a, hnathawh hmuh theihin a awm. Rei vak loah forest clearance tihfel a ni ang," a ti a, Mualkhang Gas Bottling Plant-ah theihtawp an chhuah thu a sawi.

Supply Minister chuan, Tripura aṭanga gas pipeline lo kal chu a nodal department ni chiah lo mah se, Chief Minister remtihnain essential commodity a nih tho avangin an ngaihven thu a sawi a, "Engineer-te pawh ka ko tawh a, hma an la chho mek zel," a ti.