LMC leh HPC a ngaiin awm rih dawn

Nimin Assembly session-ah chief minister Lalduhoma chuan, Lunglei Municipal Council (LMC) leh Lunglei High Powered Committee (HPC) chu Cabinet-in a ngai anga awm zui phawt tura an rel thu a sawi.

CM Lalduhoma chuan, LMC a din hma zawngin Lunglei HPC-ah dinna an neih thu sawiin, "HPC hi hetianga executive order behchhan ringawta awm hi a tâwk kan ti loa, legislate ve ngei se kan duh. Thuam ṭhat a, hmasawnna hna tam zawk thawk theia sorkarin a duh duha a tih theih loh tura legislate hi kan duh dan a ni. Mahse, municipal a piang ta si, municipal awm hma leh awm hnu a inang thei lo," a ti.

An sorkar hnuah inrenchem an kalpui avangin Resource Mobilization Committee an din thu sawiin Lalduhoma chuan, "Anni hian rawtna tam tak an rawn thehlut a, eng emaw zat kan tihlawhtling tawh a, tihhlawhtlin hmabak pawh kan nei," a ti a; LMC a pian tawh avangin HPC a ṭul tawh lo tih chu rawtna an neih pakhat a nih thu a sawi.

Chief Minister chuan, rigid pavement hmanga kawng siam chu a man to deuh mah se, a tlo bik tih sawiin, "Kum 10, kum 15 mai ni lo, kum 20-te a daih a, khuarei atan a ṭha. Chutihrualin, estimate awm tawh sa erawh kan ti thei dawn lo. Min phalsak a nih chuan kawng siam thar tur, estimate awm sa ni lote chu rigid pavement hmanga siam zel tawh tur a ni ang," a ti.

Mizorama kawng zingah BRO kuta pek sa eng emaw zat a awm tih sawiin Lalduhoma chuan, "Pek belh leh a ṭul chuan kan pek belh ang, ṭha kan tih chuan. Mahse, tuna kan harsatna chu land acquisition (ram lâk) a ni a, BRO-te'n hna an thawk thei lo. Home Secretary lo kalte nen pawh kan sawi a, an ngai pawimawh hle," a ti a; central dan nge state dan hman turah court-ah an inkhin mek thu a sawi.

Chief Minister sawi danin, dan hman turah court-ah inkhin mek a nih avangin hna ṭan theih a la ni lo a, a chinfelna tur tun session-ah hian PWD Minister-in a pu lut dawn a, BRO pawhin hna an ṭan thei tura ngaih a ni.