


Chapchàr Kût hman ṭan a ni
Nimin khan Lam-mualah Chapchàr Kût hman ṭan a ni a, minister Lalthansanga khuallian a ni. Vawiin hian Chapchar Kût hman chhunzawm a ni dawn a, Aizawl bakah Mizoram hmun hrang hrangah hman a ni ang.
Lammuala nimina Chapchar Kût hmannaah hian hnam lâm, zai leh nunphungte entir a ni a; Páng, Paite, Bâwm leh Hmar hnamte bakah, Nagaland Cultural Troupe leh Fiji aṭangin cultural troupe ten an hnam lâm an entir a ni.
Minister Lalthansanga chuan, Chapchâr Kûtah thupui atan Zo nun ze mawi hrang hrang chawisang tur thlan a ni ṭhin chu ṭha a tih thu sawiin, "Mizoram leh khawvel hmun hrang hranga Zo fate'n mahni awmna hmun ṭheuhah Zo nun ze mawi nunpui a, chawisang zel tur kan ni," a ti a; kût hmangtute chu an bul hnaia mite chungah hawihhâwmna lantira, kût ropuina leh hlutna pho lang zel turin a chah.
Nimina Kût hmannaah hian Mizoram páwn aṭangin YMA Manipur Group, Tripura Group, Shillong Group leh Halfong Branch bakah, Thangram Indigenous People hruaitute an tel.
Chapchar Kût hi vawiin hian Mizoram hmun hrang hrangah hman chhunzawm a ni dawn a; Aizawlah chuan Lammualah hman tur niin, chawhma dar 10:30-ah ṭan tur a ni a, chief minister Lalduhoma kût pa niin, Art & Culture minister C Lalsawivunga kût thlengtu a ni ang.