MNF MLA-te huaisenna rohluah ngai: CM hi mi rilru hrisel lo a ni – MNF

Mizo National Front (MNF) chuan Assembly Budget Session-a Mizoram Youth Commission (MYC) bill sawiho a nih laia Chief Minister thusawi dan chu mi rilru hrisel lo a nih zia tarlang tu a nih thu an sawi a; "MNF MLA-te huaisenna chu ram rorelna kal mekah rohlu takah kan ngai," an ti.

MNF chuan nimin khan thuchhuah siamin, Assembly Budget Session kal mekah March 3, 2025-a MYC bill sawiho a nih laia CM thusawi dan chu an dem thu an tarlang a, "Chief Minister leh House leader Pu Lalduhoma'n MYC dinna leh a kalpui dan lo awm tawh chu hman chhunzawm tlak loh leh sorkar kal tawhte'n anmahni inhaivurna tura din leh kalpui anga a sawi mai duh hi demawm kan ti takzet a. He'ng bill-te hi sawiho leh pass a nih lai pawha MLA ni ve reng, a hunlaia engmah sawilang lo, tuna a chhe ber anga a chhuah duh hi mi rilru hrisel lo a nihzia pholangtuah kan ngai," an ti.

Dan siamṭhat, belh ngai belh leh paih ṭhen ngai paih ṭhen chu thil kalphung a nih thu tarlangin MNF chuan, "House leader ber thusawi, house kalphung lo lutuk dodalna leh house zahawmna hum tura opposition MLA-te'n huaisen taka bill an pass pui lo ngam kha chhuanawm kan ti. Ram tana thil ṭha thlen tur leh khua leh tuite hamṭhatna tura an auchhuahnate fakawm kan tiin, a bik takin MNF MLA-te huaisenna chu ram rorelna kal mekah rohlu takah kan ngai," an ti a, Mizoramin vènpui ngai sorkar a neih mek thu tarlangin, hemi venpui kawngah hian theihtawp chhuah chhunzawm zel turin duhsakna an hlan bawk.