Saitual district-a SCC parukah sawhthing kg. 5,82,907 a awm

Saitual District Agricultural Marketing Committee chu nimin khan an chairman Dr Lalngura Tlau, bawrhsap hoin an ṭhukhawm a; Saitual district-a sawhthing secondary collection centre (SCC) parukah sawhthing kg. 5,82,907 dahkhawl mek a nih thu tarlan a ni.

Ṭhutkhawma tarlan danin, February 20, 2025 aṭanga nimin chawhnu dar 2:50 thleng khan Saitual SCC-ah sawhthing kg. 98,700, Keifang SCC-ah kg. 1,14,791, Ngopa SCC-ah kg. 1,76,876, Phullen SCC-ah kg. 55,200, Suangpuilawn SCC-ah kg. 50,111, Phuaibuang SCC-ah kg. 87,229, a vaiin kg. 5,82,907 dahkhawl (stock) mek a ni a; MAMB portal-a alan danin, tun dinhmunah kg. 4,00,000 vel lak tawh niin, cheng nuai 200 man hu a ni.

Sawhthing lei thawh hnihna atana Saitual district-a SCC pasariha sawhthing an dawn khawlte chu lilàm (auction) hun chhung siam a, a chhang huai berte hnenah hralh tur a ni a, auction chhangtute leina chu MAMB account-ah a lut ang a, sawhthing hralhna man chu sawhthing chingtute'n SCC-a an hralhna/bûkna milin pek chhuah leh ṭhin tur a ni.

A thawh thumnaah chuan SCC-a stock-te tih ral zawh veleh dan pangngaia sawhthing lak chu kalpui lehnghal tur a ni dawn a, stock tawh loin a rawn lut hmasa apiang chu support price anga pek chhuah zel tur a ni ang.