Ngopa Ṭhalaiin zangnadawmnaah sum chingpen a awmah an ngai

Ngopa Ṭhalai Pawl chuan thuchhuah siamin, zangnadawmna leh thildanga sum tihchingpen chungchangah Ngopa VC te ṭhiat (dissolve) turin Local Administration department (LAD)-ah April 15, 2024 khan ziakin complaint an thehlut tih an tarlang.

Ngopa Ṭhalai Pawl tarlan danin, complaint an thehluh hnuah LAD lam aṭangin zirchianna hrang hrangte neiin, hmalaknate pawh an nei. LAD hian zirchianna leh an hmalakna hrang hrangahte hian Ngopa VC-te hian zangnadawmna chung­changah dik lohna tamtak an nei a ni tih hmu chhuak mah se, VC hi an ṭhiat ngam lo. LAD hian thuchhuah an neih ngam tak loh avangin Ngopa Ṭhalai Pawl chu LAD chungah leh LAD Minister chungah hian an lawm lo hle a ni.

Ngopa VC-te LAD-a complaint an thehluh chungchangah hian, department hotute leh LAD Minister pawhin Ngopa VC-te dik lohna hi a hmu reng tawh nia tarlangin Ngopa Ṭhalai Pawl chuan, "Amaherawhchu, ṭhiat tura hmalakna an nei duh tlat lo hi kan hrethiam lo. Ngopa khaw mipui min hmuhsitnaah kan ngai," an ti.

Ngopa Ṭhalai Pawl chuan tunhnuah hetiang hi thleng nawn tawh lo se an duh thu tarlangin "A thleng nawn leh a nih erawh chuan department/sorkar lamah kan ṭuan tawh lo ang," an ti a, a theih dan dan leh an rem hriat dan ang angin Ngopa khaw mipui tan hma an la zel tawh dawn tih an tarlang.