KHAWTHLIR

Mizoram UPC-te'n  PYD Day hmang

Mizoram UPC kohhran ṭhalai pawl, Pentecostal Youth Department chuan nimin khan PYD Day vawi 65-na an hmang a, bial leh tualchhung angin hmun hrang hrangah hman a ni. Day pual hian PYD-te chuan zing leh chhun lamah vantlang tana thil ṭha tiin hun an hmang a, vantlang hmun tihfai bakah bial ṭhenkhat chuan thisen pein, zan lamah a lawmna programme neih a ni bawk.

Bill pawm

Nimin Assembly session-ah IPR minister Dr Vanlalthlana putluh 'The Mizoram Exhibition of Films on Television Screen through Video Cassette Players (Repeal) Bill, 2025' chu lungrual takin an pawm.

Zirtirtu inhmukhawm

Mizoram Primary Teachers Association (MPTA) chuan nimin khan Mamit Chhimveng YMA Hall-ah councillor meeting an nei a, ro an rel bakah, kum 2025-2027 chhunga an hruaitu tur an thlang. MPTA-ah hian member 1,299 an awm mek a, kum 2023-2025 chhungin an member 19 thiin, 190 an pension.

Chetsualnaah thi

Ramluahpuia (32) s/o F Lalchhanliana, Hmunhmelṭha chu March 3, Thawhṭanni zan dar 9:20 khan tractor-a a chetsual avangin a thi. Ramluahpuia hi an khaw ramah December 2024 khan a chesual a, Aizawlah enkawl niin, a hliam tuar loin Thawhṭanni zan khan a thi.

DC hnenah sawihfiah dawn

Champhai district bawrhsap Mohammed Aaquib hoin nimin khan DC conference hall-ah Champhaia sorkar hotute ṭhu a; March 10, 2025 aṭangin Champhai district-a sorkar pisa hrang hrangte'n a tahtawlin DC pisaah an hmalakna leh hmachhawpte sawifiah ṭhin turin thutlukna an siam.

DSDC ṭhukhawm

Kolasib District Skill Development Committee chu nimin khan DRDA project director Lalmuanpuia kaihhruaiin an ṭhukhawm a, District Skill Development Plan 2025-2026 hnuaia kum 2025-2026 chhunga Kolasib district-a eizawnna tlak thiamthil hrang hrang mipui hnena chhawpchhuah dan tur an sawiho.

TB endik runpui buatsaih

Nimin khan District TB Team, Aizawl leh Health and Wellness Centre Team, Maubawk ṭangkawp chuan Maubawk Veng chhungah TB vei an awm leh awm lo endik runpui Maubawk Local Council House-ah an buatsaih. TB vei awlsam bik dinhmuna ding (vulnerable list) te kohkhawm niin, X-ray hmanga endik an ni. Mi 54 endik tawh niin, mi 51 X-ray tawh an ni a, mi 12 te chu an khak exam leh tur a ni ang.