Hmeichhe hruaitute pualin ruihhlo do zirhona buatsaih

Social Welfare & Tribal Affairs department chuan nimin khan Lianchhiari Rûn, IPR-ah kohhran hrang hranga hmeichhiate leh hmeichhe pawl (women federation)-te pualin 'two days capacity building programme on drug abuse prevention' an buatsaih a; Social Welfare minister Lalrinpuii'n a hmanpui.

Lalrinpuii chuan, kohhran nuhote leh hmeichhe pawl hrang hrangte chu ruihhlo do kawnga sorkar thawhpui turin a sawm a, "Kan ramah hian sorkar leh pawl hrang hrangin mahni zawn ṭheuhah theitawp chhuahin ruihhlo kan do mek a, a thlamuan thlak rualin a sâwt hleithei lo hi chu a beidawn thlak chang a tam ṭhin hle. Mahse, kan sorkar pawhin theihtawp a chhuah a, hemi kawngah hian sumte pawh a dah tam tawh a ni," a ti a, thâ thlah loa ṭanrual zel a pawimawh thu a sawi.

Ruihhlo dona atana pawimawh chu a la ti ve lote ven leh ti mekte chhanchhuah a nih thu sawiin Social Welfare Minister chuan, "Tunah hian de-addiction leh rehabilitation centre-te'n rualkhai leh mumal taka ruihhlo ngaite enkawlna an kalpui theih nan state level accreditation buaipui mek a ni," a ti a; Pathian thu hmanga enkawlna leh zirchhuakte thiamna hmanga enkawlna kalpui kawptir thiam a pawimawh thu a sawi.

He hun hi SWTA director Dr Lalhriatzuali Ralte-in a kaihruai a; national expert Lalbiakhlui Rokhum chuan ruihhlo do kawnga thil pawimawh hrang hrang a zirtir. Zirhona hi vawiinah chhunzawma zawh a ni ang.