LADC CEM atan V Zirsanga la lut

Lai Autonomous District Council (LADC) chief executive member atan ZPM Legislature Party leader V Zirsanga nimin khan lak luh a ni.

LADC CEM lak luhna inkhawm hi LADC Hall-ah buatsaih a ni a, LADC executive secretary K Lalthanzara'n kaihruaiin, Rev. Vanlaldinpuia Aineh-in hunserh a hmang. Lawngtlai bawrhsap Cheemala Siva Gopal Reddy chuan CEM atan V Zirsanga chu rinawmna thu tiamtirin a la lut a ni.

Lak luhna inkhawmah hian adviser to CM (Health) Dr Lorrain Lalpekliana Chinzah, adviser to CM (Political) Lalmuanpuia Punte leh Lunglei West bialtu MLA T Lalhlimpuia te an tel a; LADC MDC-te leh official-te bakah, Aizawl leh Lawngtlaia ZPM party hruaitute an tel bawk.

LADC CEM thar V Zirsanga chuan, miin court rorelna kalkawng awmzia an hriatthiam loh avanga amah demna leh chêksawlhna nasa tak awm ṭhin chu pawi a tih thu sawiin, "Pathianin thu dik a hria a, a hun takah rorelna dik hmanga thu dik hai lan a nih thuai ka beisei," a ti.

ZPM party kaltlanga ram hmasawnna tur ngêlnghet eng emaw tak thlen an inbeisei thu sawiin Zirsanga chuan, "Mizoramah kalphung thar sorkar kan nei ang bawkin LADC-ah pawh a theih chin chinah kalphung thar hmangin rorel a ni dawn," a ti a; LADC kalphung an siamṭhatna tur kawngah hliam leh na deuh an awm palh a nih pawhin, kaltlangpui a inhuam thu a sawi.