CM-in hmeichhiate tihhmasawnna tur NITI Aayog hnuaia kalpui a hawng
NITI Aayog State Support Mission hmalakna hnuaiah nimin khan Aijal Club-ah Women Led Development through Entreprenuership Workshop buatsaih a ni a, chief minister Lalduhoma'n Women Entreprenuership Platform (WEP), Mizoram Chapter a hawng. NITI Aayog member Dr VK Paul khualzahawm a ni.
CM Lalduhoma chuan, India hmarchhaka NITI WEP Chapter bul ṭanna atan Mizoram thlan a nih avangin NITI Aayog thuneitute chungah a lawm thu a sawi a, "A hlawhtlin theihna atana a bul aṭanga engkim buaipuitu LESDE minister Pu Lalnghinglova Hmar chungah ka lawm hle. NITI Aayog member Dr VK Paul-a'n min rawn telpui thei hi kan vannei a, rah ṭha a chhuah ngei ka beisei," a ti.
Mizoram economy-ah hmeichhiate'n an thawh hlâwk hle tih sawiin Lalduhoma chuan, "Theihna an nei a, hmasawn zelna tur remchang pawh a tam. Sorkarin ṭhalai, entreprenuer ṭhate tan Bána Kaih scheme kan kalpui ṭan a, tunah hian pilot phase-ah thawhpui turin progress partner 517 kan thlang tawh," a ti a, progress partner thlan zinga 140 (27%) chu hmeichhia an nih thu a sawi.
Chief Minister chuan, hmeichhe tam zawkin Bana Kaih scheme an chhawr zel an beisei tih sawiin "NITI Aayog nen hian Bána Kaihah leh scheme dangah thawkho turin kan inpeih reng. Vawiina NITI workshop hi hmeichhiate tichak tura policy kan duanna leh NITI Aayog nena kan thawhhonaah a ṭangkai hlein ka ring," a ti.
NITI Aayog member Dr VK Paul chuan, "Mizorama hmeichhia mahni kea dinga sumdawnna kalpuite tana buatsaih CM-in min hawnsak tâk WEP hi in ṭangkaipui ngei dawn. WEP-ah hian a tam thei ang berin registration ti se kan duh," a ti a; hmeichhiate tihhmasawn hi India ramin ram changkang a thlen theihna tura tihmâkmawh a nih thu a sawi bawk.
Lalmalsawma Pachuau, Secretary, Planning & Programme Implementation chuan Sustainable development leh Viksit Bharat 2047 thlentir tuma Mizoram sorkar hmalakna hrang hrang sawifiahna a nei ve bawk. Chu mi hnuah kal khawmten sawihona hun an nei zui a ni.
Naktukah hian Mizoram University-ah India hmarchhaka NITI Aayog-in Women Empowerment Programme (WEP) hma an lakna bul an ṭan ang a, workshop an buatsaih ang.
CM-IN WEP HMALAKNA A HAWNTE
• WEP State Chapter Mizoram
• Yashasvani Program with M/o MSME
• Swavalambini Program with MSDE
• WEP Award to Reward Programme with New Shop
• WEP App Launch Beta Version
• Awards to Women Entreprenuers by MAKE MY TRIP