MBMP-in ruihhlo do an rêl

Mizoram Baptist Mipa Pawl (MBMP) rorel vawi 4-na chu nimin khan Baptist Centre, Aizawlah neih a ni a, ruihhlo doa hmalak an rêl a; environment, ramngaw leh nungcha humhalh kawngah MBMP-in hma la chhunzawm zel rawh se, an ti bawk.

BMP rorel hi MBMP president Chawnglura Chawngthu-in a kaihruai a, palai 381 an tel. Rorel ṭan hmain rorel vawi 3-na leh vawi 4-na inkara an member thi mi 376-te sûnna hun hman a ni.

MBMP-ah hian BCM pastor bial 80-ah unit 351 an awm a, member 17,067 an awm mek. Nimina rorelah hian kum 2025-26 budget atan Rs 14,00,000 an pawm bawk.