Bána Kaih (Handholding) hnuaiah DPR 520 hma lakpui tlakah ngai

Mizoram sorkar flagship programme, Bána Kaih (Handholding) scheme hnuaiah a thawh khat nan progress partner ni tura dilna 11,430 a lut a, chu'ng zinga 520 (4.55%) chu sorkarin hmalakpui tlakah ngaiin, nimin khan endik a ni.

Mizoram State Policy Coordination Committee hnuaia Apex Body chu nimin khan Planning committee room-ah an ṭhu a, adviser to CM (handholding) Dr KC Lalmalsawmzauva'n a kaihruai. Sorkar department 15 kaltlanga progress partner dilna lut 11,430 zinga hmalakpui tlaka ngaih detailed project report (DPR) 520 endik a ni.

Sorkar thuchhuah tarlan danin, Bána Kaih implementing department 15 kaltlanga dilna 11,430-te zir chianna aṭangin hmalakpui tlaka ngaih DPR 520 endik a ni a; DPR thehluh zawng zawnga loan dil zat chu Rs 61,30,72,748 (nuai 6,130.72) a ni. Chawhrualin, DPR pakhata loan dil zat chu Rs 12,16,414 (nuai 12) ang zel a ni.

Ṭhutkhawmah hian Bána Kaih hmanga hmalakna ngêlnghet kalpui chhunzawm zel tura theihna neite leh mi dang tana eizawnna siam thei hmalakna ngaih pawimawh a ṭul thu tarlan a ni a; ṭhutkhawma dilna pawmte chu bank-in uluk takin a endik leh tur thu tarlan a ni bawk.