Ram chak leh hlawhtling zawk siam tura intiam thar turin ngen

Governor Gen Vijay Kumar Singh chuan Mizoram mipuite State Day chibai a bûk a; Mizoram leh India ram chak leh hlawhtling zawk siam tura intiam thar leh turin mipui a ngen.

Larsap Gen. VK Singh chuan, February 20, 1987 khan Mizoram chu India ram state 23-na ni tura state dinhmuna hlan kai a nih thu sawiin, "He ni pawimawh tak hi Mizoram tana hmasawnna, remna leh hlawhtlinna tura bul ṭanna thar duhawm tak a ni," a ti.

State Day chu tawrhchhelna, inpumkhatna leh Mizo mipui beiseina a taka chantirna leh nemnghehna a nih thu sawiin Larsap chuan, "Inbiakna leh mipui thlan rorelna kaltlanga hnehna lantir a ni," a ti a, June 30, 1986-a India sorkar leh Mizo National Front-in inremna an ziah chu India ram chanchina inremna hlawhtling bera ngaih a nih thu a sawi.

Gen. VK Singh chuan, Mizoram chu state-a hlàn kai a nih hnuah zirna, hriselna, hmasawnna ruhrel siam leh ni tin khawsak kawngah hmasawnna chhinchhiah tlak tak tak a neih thu a sawi a, "Kan hnam ziaráng hausa tak te, nunphung nghet ṭha tak bakah, lungrual leh inpawh tlang taka kan khawsakhonate hian ram pum a fan hneh hle a ni," a ti.

Mahni hnam ziaráng leh nunphungte hloh ṭhen chuang hauh loin hnam inpumkhatna kalpui theih a nih thu sawiin Larsap chuan, India khua leh tuite inpumkhatna tura hmalakna, 'Ek Bharat Shreshtha Bharat' thil tumte hre reng chunga mi dangte hnam ziaráng leh nunphungte inngaihvensak a, inzir tawn turin mipui a sáwm. India ram chu kum 2047-ah ram changkang leh intodelh ni tura hmalaknaah theihtawp chhuah turin a sáwm bawk.

Governor chuan, Mizoram leh India ram chak leh hlawhtling zawk siam tura intiam thar ṭheuh turin mipui a ngen a, "He ni chhinchhiah tlak tak kan lawm mek rual hian Mizoram leh India ram chak leh hlawhtling zawk siam turin intiam thar leh ṭheuh ila, ram leh hnam ro hlute vawng him chung zel leh, chhuan lo la awm turte hmakhua ngai chung zelin lungrual takin hmasawnna hna i thawk tlang zel ang u," a ti.