Aizawl district-a thlai thar lei turin Local Purchase Advisory Board din

Aizawl District Agricultural Marketing Committee (DAMC) chu an chairman Lalhriatpuia, bawrhsap hoin nimin khan DC conference hall-ah an ṭhu a; thlai thlan bik (notified crop) lei turin Local Purchase Advisory Board din an remti.

Ṭhutkhawmah hian Aizawl DC kaihhruai Local Purchase Advisory Board din rêl niin, member secretary atan Aizawl DAO an ruat a, member dangte an ruat nghal bawk.

Sawhthing chingtute hman tur kg. 40 dawng ip (mesh bag) a thlâwna sem dan tur leh a kaihhnawih thil te, secondary collection centre-a supervisor-te leh coordinator-te thawhho dan tur te, kut hnathawktute sawhthing hralhna man an bank account ṭheuha thun dan tur leh, secondary collection centre-a kawlphetha dinhmun leh thlai thlan bikte lei leh hralh dan thlirho tura weekly review meeting neih chungchangte an rêl a ni.